Dr. Labinot Greiçevci është ekspert në shkenca politike dhe ka interesim për relacionet në mes të shkencave politike dhe disiplinave të përafërta akademike. Lëndët e ligjërimit dhe hulumtimet e tij përfshijnë shtet-ndërtimin ndërkombëtar, politikat e jashtme të Bashkimit Evropian, relacionet mes BE-së dhe Ballkanit Perëndimor. I përfundoi studimet bachelor në Shkencat Politike në Universitetin e Prishtinës (2004), studimet master në Shkenca Politike (Politika Evropiane dhe Politika Publike) në Universitetin e Mançester-it (2006), dhe doktoraturën në Shkenca Politike e bëri në Universitetin e Gent-it në Belgjikë (2011). Ai gjithashtu ka bërë hulumtime në Universitetin e Mançester-it si hulumtues në Departamentin e Politikës (2006/07), hulumtues i Shkencave Politike në Universitetin e Amsterdamit (2008), si dhe në Departamentin e Politikës dhe Marrëdhënieve Ndërkombëtare në Universitetin e Oxford-it (2010). Ai ka publikuar shumë artikuj, duke theksuar këtu publikimet në European Foreign Affaris Review (2007), L’Europe en Formation (2008), ISIG- Quarterly of International Sociology (2009), Perspectives on European Politics and Society (2011). Labinoti është pjesëmarrës i shpeshtë i ngjarjeve dhe konferencave evropiane dhe ndërkombëtare në lidhje me temat për rolin ndërkombëtar të BE-së dhe çështjet e shtet-ndërtimit, si dhe luan rol aktiv në organizimin e këtyre ngjarjeve. Për hulumtimet e tij, Labinoti është shpërblyer me grante nga Agjencioni Evropian për Rindërtim, Fondacioni SOROS me seli në Londër dhe nga programi Erasmus-Mundus i Bashkimit Evropian. Më herët, ka punuar si bashkëdrejtues dhe ligjërues në Departamentin e Shkencave Politike në Universitetin e Biznesit dhe Teknologjisë. Po ashtu, ka punuar si këshilltar në Zyrën e Kryeministrit përmes konsulencave të ndryshme ndërkombëtare.

Dr. Qerim Qerimi aktualisht ligjëron për të Drejtën Ndërkombëtare, Organizatat Ndërkombëtare, dhe të Drejtën Ndërkombëtare për të Drejtat e Njeriut në Fakultetin Juridik të Universitetit të Prishtinës. Gjithashtu, është bashkëprofesor i të Drejtës Ndërkombëtare Publike dhe Diplomacisë dhe Komunikimit në Universitetin Veror Ndërkombëtar të Prishtinës. I arsimuar në drejtësi dhe shkenca politike, ai ka një interesim të veçantë për çështje të filozofisë politike dhe marrëdhënieve ndërkombëtare, të gjitha aspektet e të drejtës ndërkombëtare publike, dhe të drejtën e zhvillimin njerëzor. Së fundmi Profesor dhe Studiues Vizitor, si dhe fitues i bursës Fulbright për studiues, në Universitetin e Harvardit (2011–2012), Qerimi është themelues i Revistës së Universitetit të Prishtinës për të Drejtat e Njeriut dhe Politikat, kryeredaktor i revistës E Drejta të Fakultetit Juridik të Universitetit të Prishtinës, dhe anëtar i Bordeve Editoriale të International Journal of Trade and Global Markets dhe Revistës Shqiptare për Studime Ligjore. Këshilltar i dikurshëm i lartë i Ministrit të Punëve të Jashtme të Kosovës (2008-2010), ai ka shërbyer edhe si ekspert i lartë ligjor për një projekt të Bashkimit Evropian në Zyrën e Kryeministrit të Kosovës (2006–2008). Përvojat e tij të tjera nga bota e praktikës përfshijnë punën me Organizatën Ndërkombëtare për Migrim (IOM), dhe si këshilltar, për një numër projektesh të financuara apo zbatuara nga Bashkimi Evropian, USAID-i, Banka Botërore, dhe korporata private. Në periudhën ndërmjet viteve 2005 dhe 2006, ai ka qenë bashkëpunëtor shkencor në Institutin Max Planck për të Drejtën e Krahasuar Publike dhe të Drejtën Ndërkombëtare në Heidelberg, Gjermani, dhe në verën e vitit 2006, ka ndjekur Akademinë e Hagës për të Drejtën Ndërkombëtare. Nga publikimet e tij të shumta, Qerimi është autor i një libri të fundit për Zhvillimin në të Drejtën Ndërkombëtare: Një kërkim i orientuar nga politikat (2012, Martinus Nijhoff Publishers: Leiden dhe Boston), dhe autor i Ekonomisë Politike të Evropës Juglindore, publikuar nga Continuum International Publishing Group në Nju Jork (me B.S. Sergi). Sa u përket publikimeve në revista akademike të cituara ose me recension ndërkombëtar, ai ka publikuar në të tilla si: Chicago-Kent Journal of International and Comparative Law, US-China Law Review, Asia Pacific Law Review, International Journal of Social Ecology and Sustainable Development, International Journal of Business Governance and Ethics, Utrecht Journal of International Law, South-East Europe Review for Labour and Social Affairs, Southeastern European Politics, Politikon, Problems of Economic Transition, Transition Studies Review, Journal of East-West Business; World Review of Entrepreneurship, Management and Sustainable Development; Newsletter of the School of Human Rights Research, etj.

Shpend Voca është ekspert për çështjet ndër-etnike dhe pakicat në Kosovë dhe më gjerë në Ballkanin Perëndimor. Shpendi ka diplomuar në Universitetin e Prishtinës, në Degën e Psikologjisë. Më pas, ai përfundoi studimet post-diplomike dhe masterin në Applied Transformation Studies përmes rrjetit të Nansen Dialogue (ND) në rajon, Mbretërinë e Bashkuar dhe Norvegji. Më herët, ai ka punuar me Kosova Nansen Dialogue në Prishtinë, duke ndihmuar në procesin e dialogut ndër-etnik. Për të plotësuar përvojën e tij akademike, Shpendi ishte pjesë e shumë trajnimeve të ndryshme për zgjidhjen e konflikteve, teoritë e konfliktit, dhe publikoi ne Birmingham studimin e mëposhtëm: “Efektet e dialogut ndëretnik në uljen e paragjykimeve dhe komunikimi i përmirësuar në Kosovë”. Më herët, Shpendi ishte i përfshirë si psiko-analist në Departamentin e Drejtësisë (UNMIK), Zyra për Personat e Pagjetur dhe Forenzikë, duke bërë hulumtime për identifikimin dhe vlerësimin e nevojave psiko-sociale të familjeve të të pagjeturve. Shpendi, po ashtu, ka përvojë si trajner dhe këshilltar në çështje të ndryshme sociale me organizata dhe konsulenca të ndryshme kombëtare dhe ndërkombëtare.